NEXOS: Samuel Diz presenta «A guitarra de Lorca» na Casa Museo Casares Quiroga

 

No marco do ciclo NEXOS, a Asociación Cultural AÏS organiza unha nova sesión dedicada á activación cultural, á investigación musical e á reflexión arredor da nosa memoria histórica.

 

O vindeiro xoves 15 de outubro ás 18:00 h, a Casa Museo Casares Quiroga acollerá o concerto e coloquio do guitarrista e investigador Samuel Diz, quen presentará o seu proxecto A guitarra de Lorca.

 

O recital interpretarase coa réplica exacta da guitarra orixinal construída en Granada por José Ortega cara a 1906, propiedade de Federico García Lorca. A través do timbre e da acústica histórica deste instrumento, Samuel Diz reconstrúe o imaxinario sonoro da Idade de Prata e da Segunda República, poñendo o foco no legado do exilio republicano de 1939 e na recuperación das compositoras silenciadas polo canon historiográfico.

 

 

Tras a intervención musical, abrirase un espazo de coloquio e diálogo co público asistente para afondar nas dimensións éticas, artísticas e históricas da creación musical e da memoria democrática.