O pasado sábado 13 de setembro achegámonos ao Souto das esculturas Galán-Nistal, en San Martiño de Meirás (Sada), dentro do ciclo Entre Liñas. Acompañados polas explicacións de Pepe Galán e a presenza musical do trompetista Wilson Ortega, vivimos unha xornada de encontro coa arte, a paisaxe e a comunidade. A actividade contou coa colaboración da Asociación Alexandre Bóveda e co apoio da AÏS.

Entre carballos e castiñeiros, este espazo creativo acolle as esculturas metálicas de Pepe Galán, realizadas en diálogo coa arquitectura de Alfonso Fernández. O ferro, a pedra e a madeira mestúranse coa natureza, creando un territorio no que a arte respira co tempo e co lugar.

Visitar o Souto é entrar nun escenario onde o silencio fala e cada recuncho conta unha historia. A obra de Galán comprométese coa terra e coa memoria, abrindo camiños entre a creación contemporánea e o espírito da paisaxe galega.